Informashon di Wikipedia.

• 
  Papiamentu (na Aruba: Papiamento) ta un idioma krioyo ku un base portugues-afrikano. E ta e lenga materno di e mayoria di e poblashon di Aruba, Boneiru i Kòrsou i ta e lenga mas papiá na e islanan ABC. E idioma tin e ròl di idioma nashonal, formando un parti importante di e identidat di e islanan i unifikando e diferente gruponan di poblashon. Banda di e lenganan Arawak ku restunan di e habitantenan original di islanan ABC tabata papia, papiamentu su vokabulario ta influenshá pa e idiomanan ingles, hulandes i spaño. Ta skirbi e nòmber di e lenga diferente na Aruba, esta Papiamento i diferente na Boneiru i Kòrsou, esta Papiamentu. E lucha pa un ortografía uniforme na islanan di Antias Hulandes di antaño a dura largu i a resultá finalmente den dos entidat polítiko i dos diferente ortografía. Na 2003 Papiamentu a keda rekonosí komo idioma ofisial na Aruba banda di Hulandes i na 2007 na Antias Hulandes banda di Hulandes i Ingles. Na 2022 Gobièrnu hulandes ta propone pa rekonosé Papiamentu na Boneiru komo idioma di minoria na Oropa i pa laga esaki resorta bou di e "Charter oropeo pa idiomanan regional i di minoria". Riba e islanan ABC, Papiamentu tabata parti di e movementu mas grandi di emansipashon. Rekonosementu komo idioma ofisial, oumento di status, standardisashon, mas publikashon i introdukshon di Papiamentu den enseñansa awe ta ser konsiderá logronan importante den e lucha pa rekonosementu i desaroyo di e idioma.