Informashon di Wikipedia.

• 
  Bakteria ta forma un gran parti di e dominio di mikroorganismo prokaryotiko. Tipikamente algun mikrometer largu, bakteria ta eksisti den varios forma manera esfera, bara i asta spiral. Bakteria tabata un di e promé formanan di bida ku a aparesé riba mundu, i ta presente den mayoria habitat. Bakteria ta biba den suelo, awa, fuente termal asido, sushi radioaktivo, i e partinan di mas hundu di e mantel di Tera. Tambe tin bakteria ku ta biba den relashonnan simbiotiko o parasitiko ku mata i bestia. Gran mayoria di bakteria no a wòrdu karakterisá, i solamente mitar di e divishonnan di bakteria ta kontené sorto ku por wòrdu kultivá den laboratorio. E estudio di bakteria ta konosí komo bakteriologia, i ta un rama di mikrobiologia. Normalmente, tin 40 mion sel bakterial den un gram di suelo i 1 mion sèl bakterial den un mililiter di awa dushi. Tin aproksimadamente 5×1030 bakteria riba mundu, lokual ta nifiká ku nan ta forma un biomasa ku ta surpasá e biomasa di tur mata i bestia. Bakteria ta vital den hopi etapa di e siklo di nutrishon dor ku nan ta resikla nutriente den prosesonan manera asimilashon di nitrogeno for di e atmósfera. E siklo di nutrishon ta inkluí e deskomposishon di kadaver, i bakteria ta responsabel pa e proseso di putrimentu. Na komunidat biológikonan rònt di e fuentenan hidrotermal i fuentenan friu, bakteria extremofilo ta ofrese e nutrientenan nesesario pa sostené bida dor di komberti supstansianan ku a wòrdu disolbé manera sulfuro di hidrógeno (H2S) i metan (CH4), den energia. Den mart 2013, investigadónan a publiká datonan ku a wòrdu reportá na òktober di 2012. E datonan ta sugerí ku bakteria ta floria den e Trinchera di Mariana, e parti mas hundu di oséano ku un profundidat di 11 kilometer. Otro investigadónan a reportá den estudionan relashoná ku mikrobio ta prosperá den baranka te ku 580 meter bou di nivel di laman abou di 2.6 kilometer di oséano for di e kosta di e kantu nortwest di Merka. Segun un di e investigadónan, You can find microbes everywhere—they're extremely adaptable to conditions, and survive wherever they are. (tradukshon:"Bo por haña mikrobio tur kaminda- nan ta ekstremadamente bon den adapta na diferente kondishon, i por sobrebibi unda ku ta.")