Informashon di Wikipedia.

• 
  Sosiologia ta e estudio di e relashonnan sosial entre hende, i partikularmente e aspekto polítiko, kultural, religioso i ekonómiko di sosiedat humano. E enfoke ta prinsipalmente e organisashon i kambionan riba kada tereno inkluso e problemanan sosial. Pregunta importante ta kon koheshon sosial, desigualdat sosial i identidat ta wòrdu realisá. Sosiologia komo un disiplina sientífiko a surgi na komienso di siglo 20, maske e término mes tabata wòrdu usá for di siglo 19 dor di un kantidat di pensadó, entre nan Auguste Comte. E disiplina akadémiko di awendia ta karakterisá pa un pluralismo teóriko i metodológiko i pues no konosé un teoria i método korekto so, sino ku por wòrdu dividi den diferente skol teóriko i metodológiko. E enfoke tradishonal di sosiologia ta inkluí stratifikashon sosial, klase sosial, mobilidat sosial, religion, sekularisashon, lei, seksualidat, género i desviashon. Estudionan resiente a añadi aspektonan sosio-tékniko di e divishon digital komo un enfoke nobo. Komo ku tur esfera di aktividat humano ta ser afektá pa e interkambio entre e struktura sosial i e agensia individual, sosiologia gradualmente a amplia su enfoke pa otro tópikonan i institushonnan, manera salú i e institushon di medisina; ekonomia; militar; kastigu i sistemanan di kontrol; internet; sosiologia di edukashon; kapital sosial; i e ròl di aktividat sosial den desaroyo di konosementu sientífiko.