Informashon di Wikipedia.

• 
  Renasementu (na franses e ta nifika literalmente: nase di nobo) ta un era den historia kultural oropeo ku a sigui despues di Edat Media i ku a termina den siglo diesshete. Renasementu a kuminsá na Italia na fin di e tempo medieval den e siglo dieskuater komo un movementu kultural i a plama den e siglonan ku a sigui pa gran parti di Oropa. Durante e periodo aki, tabatin un re-nasementu di enseñansa klásiko. Hende a kuminsá siña e teorianan di e eruditonan di Gresia, Roma i otro siudatnan antiguo. Hopi biaha ta bisa ku e Renasementu ta e komienso di e "era moderno". Durante e Renasementu, tabatin hopi progreso den arte, literatura, siensia, matemátika i kultura. Hopi artista, eskritor, filósofo i sientífiko famoso a biba durante e periodo aki. Tin biaha ta yama un persona ku ta inteligente riba un gran kantidat di tereno un "hòmber di Renasementu". E hòmber mas famoso di e époka di Renasementu ta Leonardo da Vinci, ku tabata pintor, sientífiko, músiko i filósofo. Den siglo diesnuebe e término tambe a drenta den sirkulashon komo konsepto di un époka históriko.