Informashon di Wikipedia.

• 
  Relacion sexual ta e termino cu ta referi principalmente na e introduccion i friccion di e penis, normalmente den un estado erecto, den e vagina cu e proposito di stimulacion sexual of procreacion, tambe yama sex vaginal. Relacion sexual ta provee intimidad fisico entre dos of mas persona y ta wordo practica generalmente pa hende cu e proposito di placer fisico of emocional, y tambe por yuda fortalece lasonan emocional. Aunke e termino "relacion sexual", y particularmente coitus (Latin), tipicamente ta referi na sex vaginal y e potencial pa procreacion, nan por wordo uza tambe pa describi otro formanan di sex penetrante. Esaki ta inclui penetracion anal door di e penis (sex anal), penetracion oral via e penis of e genitalnan femenino (sex oral), y tambe penetracion cu dede of co'i hunga sexual. Actonan sexual no penetrante, manera masturbacion mutuo of cierto formanan di cunnilingus, generalmente no ta wordo inclui den e definicion di relacion sexual, aunke nan tambe por contribui na lasonan socioafectivo y ta forma parti di bida sexual. E termino sex hopi biaha ta wordo uza como abreviacion pa "relacion sexual", pero tambe por referi na cualke forma di actividad sexual. Como cu e practicanan aki por carga riesgo di traspasa infeccionan transmiti sexualmente, e uzo di sex mas sigur ta wordo recomenda generalmente, aunke e riesgo ta significante mas abou cu actonan no penetrante. Tin diferente perspectiva riba kico ta constitui como relacion sexual humano y con e ta distingui di otro practicanan sexual, cu tambe por influencia punto di bista riba salud sexual. Dependiente di hurisdiccion, tin leynan cu ta prohibi cierto forma di actividad sexual, manera incest, sex cu un menor di edad, sex pafo di matrimonio, prostitucion, violacion, sodomia, of bestialidad. Creencia religioso tambe ta influencia escogencia personal pa loke ta trata sexualidad, por ehempel, pa loke ta trata virginidad, of establecemento di polisa gubernamental. Interpretacion religioso di sexualidad ta varia considerablemente entre religion y asta denter di e mes religion, aunke mayoria topico ta universal, manera e prohibicion di adulterio. Den especienan no humano contacto sexual pa proposito reproductivo ta tipico pa referi na dje como "copulacion". Den mayoria di mamifero, parmento ta tuma luga durante oestrus, latin pa e periodo di fertilidad maximo denter e ciclo reproductivo di embra, cu ta aumenta e chens pa concebi. Sinembargo, den especienan, manera bonobo, dolfijn, y chimpanse, relacion sexual tambe ta tuma luga pafo di e periodo di oestrus y actonan sexual ta tuma luga entre individuonan di e mesun sexo. Mescos cu den hende, ta kere cu e comportacion aki ta relaciona cu placer y ta contribui na fortalece lasonan social.