Informashon di Wikipedia.

• 
  Pastechi ta un desayuno òf snèk tradishonal di e islanan ABC, ku ta un mansa hasá den forma di mitar luna ku ta yená. E ta similar na un empanada, ounke e empanada tin hopi biaha un kaska di hariña di maishi, mientras cu e pastechi tin hopi biaha un kaska di hariña blanku. E mansa tin e tendensia di bira un tiki dushi. E reyeno tambe por ta bastante variá, inkluyendo karni, kuminda di laman (entre otro bakiou, tuna, kabaron) berdura òf keshi. E reyeno tambe por wòrdu mesklá ku otro ingredientenan manera siboyo, promentòn, selder, rasenchi, kumino i alkapara. Pa traha e reseta por usa sobrá di karni, hopi bia galiña òf karni porko hasá. Na Aruba, Boneiru i Kòrsou ta haya kumpra pastechi, partikularmente parti mainta, den snèkbar, panaderia of snèktruk kanto di kaminda. Asta algun di e mihó restorantnan riba e islanan ta sirbi'é. Pastechi ta ser sirbí tambe na fiesta; esakinan tin e tendensia di ta mas chikitu ku esnan ku ta kumpra ku un tamaño di mas o ménos 10 centimeter di diametro. E pastechi ta reflehá e diferente influensianan étniko i kulinario na e islanan. Entre e tres islanan por tin variashon den e ingredientenan i e preparashon.