Informashon di Wikipedia.

• 
  Para ta un grupo di vertebrado di sanger kayente ku ta forma e klase Aves. Nan ta karakterisá pa pluma, pik sin djente, e ponementu di webu ku kaska duru, un metabolismo altu, un kurason ku kuater kamber, i un skelet fuerte pero lihé. Paranan ta aparese riba tur kontinente i ta varia den tamaño, for di un kolibri (Mellisuga helenae) di 5.5 cm te na e abestrus komun di 2.8 m. Tin mas ku 11.000 espesie bibu, dividí den 44 òrden; mas ku mitar ta Passeriformes, òf "para di kanto". Mayoria di para tin ala, e ekstremidatnan dilanti modifiká. E úniko paranan sin ala konosí ta e paranan Dinornithiformes i Aepyornithidae ku ya ta ekstinto. Alanan a permití mayoria para bula, pero pa algun grupo, esaki no ta posibel mas. Esakinan ta inkluí por ehèmpel Ratite (para di kaná), pinguin, i vários espesie endémiko insular. Nan sistema digestivo i respiratorio ta spesialmente adaptá pa bula. Algun para, spesialmente paranan di laman i awa, a desaroyá adaptashon pa landa. E estudio sientífiko di paranan ta yamá ornitólogia. Para ta dinosouronan plumá, desendiente di Theropoda, i ta e úniko miembronan bibu di e grupo di dinosouro. Den kladístika moderno, nan ta wòrdu konsiderá komo reptil, komo ku krokodel ta nan pariente bibu di mas serka. Para a evolushoná for di e paranan primitivo nombrá Avialae, kende ta inkluí Archaeopteryx, ku a aparesé pa promé biaha den Jura Superior. Paranan moderno (Neornithes) probablemente a originá den Krijt Superior, òf posiblemente entre Krijt Inferior i Superior (mas o ménos 100 mion aña pasá (Ma)), i a pasa den un gran diversifikashon rònt di e ekstinshon masal di Krijt-Paleógeno (66 Ma), ku a eliminá e pterosouro i tur dinosouro ku no ta paresido na para. Hopi espesie di para ta sosial i ta pasa konosementu di generashon pa generashon, un forma di kultura. Nan ta komuniká a base di señalnan visual, yamada, i kanto, i ta eksponé komportashon manera krio kooperativo, yagmentu, kongregá, i ataká òf persiguí presa. Mayoria di espesie ta sosialmente monogamo, generalmente pa un temporada di krio, tin biaha pa vários aña i rara bes pa bida. Paranan ta reprodusí dor di pone webu fertelisá, generalmanete den un nèshi pa inkubashon te ora nan brota. Mayoria di espesie ta proveé kuido ekstenso na nan yunan. Paranan ta hunga un ròl importante den sosiedat humano. Nan ta un fuente di alimento, inkluyendo karni i webu, i ta proveé pluma pa vários uso. Paranan doméstika i salbahe tambe ta kontribuí na industria, por ehèmpel guano ta wòrdu usá komo fertilisante. Espesienan manera lora i para di kanto, ta wòrdu mantené komo bestia di kas. Paranan ta aparesé frekuentemente den arte, religion i folklore. Desde siglo dieshsete, aktividat humano a kondusí na ekstinshon di aproksimadamente 120 pa 130 espesie, ku hopi mas ya a disparsé promé ku esei. Awendia, maske ku esfuersonan pa ku konservashon, rònt di 1.200 espesie ta menasá ku ekstinshon. Observashon di para ta un aktividat rekreativo popular i un parti importante di e industria di ekoturismo.