Informashon di Wikipedia.

• 
  Nashonalismo ta un ideologia òf movementu ku ta sostené ku e nashon mester ta kongruente ku e estado. Komo movementu, e ta presuponé e eksistensia di un pueblo ku ta identifiká su mes manera un nashon i tin e tendensia di promové e interesnan di es nashon en partikular, hopi biaha ku e meta di atkeri òf mantené soberania (outodeterminashon) riba un patria persibí pa krea un estado-nashon. Politikamente, nashonalismo ta sostené ku un nashon mester goberná su mes sin interferensia eksterno (gobernashon propio), ku e nashon ta e base natural i ideal pa un entidat politiko, i ku e pueblo nashonal ta e úniko fuente legítimo di poder polítiko. Mas aleu, e movementu ta aspirá na konstruí i mantené un identidat nashonal úniko, basá riba un kombinashon di karakterístika sosial kompartí manera kultura, etnisidat, patria, idioma, polítika (òf gobièrnu), religion, tradishonnan òf kreensia den un historia kompartí. Nashonalismo ta promové unidat nashonal òf solidaridat sosial. Tin varios definishon di kiko ta un “nashon”, loke ta resulta den un variedat di tipo di nashonalismo. E dos kategoria prinsipal ta nashonalismo étniko i nashonalismo síviko. E balor moral di nashonalismo, su relashon ku patriotismo, i su kompatibilidat ku kosmopolitismo ta tema di debate filosófiko kontinuo. Nashonalismo por kombiná ku un variedat di ideologia polítiko manera konservatismo (konservatismo nashonal òf populismo derechista) òf sosialismo (nashonalismo iskierdista). Nashonalismo ta wòrdu mira komo positivo òf negativo, dependiendo di su forma i konsekuensianan. Positivamente, nashonalismo a inspirá movementunan pa libertat i hustisia, a duna bida na renasementu kultural, i a enkurashá orguyo den logronan nashonal. Negativamente, e tabata wòrdu usá pa legitimá divishonnan rasial, étniko i religioso, suprimí òf persiguí minorianan, mina derechonan humano i prinsipionan demokrátiko. Nashonalismo tabata un di e faktornan importante sitá komo kousa di tur dos guera mundial.