Informashon di Wikipedia.

• 
  E artíkulo aki ta skirbí na papiamentu. Lo ta apresiá si por mantené e artíkulo aki na estilo di papiamentu. Nanzi of Kompa Nanzi ta un araña komo figura mítiko konosí na e islanan ABC. E kuentanan folklóriko di Nanzi ta bini di Afrika, spesífikamente di Ghana, i ta konosí den un òf otro forma den henter region di Karibe, inkluso paisnan manera Sürnam i Guyana i tambe na Merka i Canada. E nòmber Kompa Nanzi òf Compa Nanzi ta aparesé solamente na islanan ABC i den diáspora di e islanan akí (entre otro na Hulanda). Algun otro figura den kuentanan di Nanzi ta Shi Maria, Shon Arei, Pega Saya, Kompa Sese, Cha Tiger. Nòmber di e figura akí pafó di islanan ABC ta mas konosí komo Ananse òf Anancy. Compé Anansi ta un di e nòmbernan na otro pais ku ta mas serka di Kompa Nanzi. A top'é na Merka. Tradishonalmente tabata konta kuenta di Kompa Nanzi na kulminashon di ocho dia (e ritual di resamentu pa despedida i pas di alma pa un defuntu). Ku tempu a bin dokumentá kuenta den buki, presentá nan komo obra di teatro, konta den foro públiko, hasi eksposishon di arte plástiko, graba kantika pa mucha i otro pa adulto, i tambe a hasi análisis sientífiko di Kompa Nanzi i su kuentanan. Kompa Nanzi awendia ta riba diferente wèpsait, Youtube, Twitter, Facebook. E kuentanan akí i otro tipo di obra ta un kolekshon chikí, kompará ku kuentanan ku tin di e araña den vershonnan pafó di islanan ABC i nan diáspora.