Informashon di Wikipedia.

• 
  Machismo ta forma un sistema di ideanan y bista mundial di cual dominio masculino ta ser glorifica hunto cu chauvinismo door di asumi cu hombresa, forsa fisico, y potencia sexual ta e esencia ideal di un homber berdadero. Den otro palabra, machismo ta un discriminacion entre sexo, alabes bista fuerte y agresivo di e orguyo y comportacion exagera masculino. E punto di bista sofocante den sociedad Arubiano riba sexualidad tin su raiznan den colonisacion y siñansanan religioso. Un ehempel tabata con instancianan educativo tabata dividi entre genero, e enfasis tabata riba hende homber pa adkiri habilidadnan specifico cu por ser aplica na e mercado laboral (por ehempel, construccion of carpinteria). Na otro banda, e curiculo prepara pa hende muhe tabata encera labor domestico. E concepto di machismo ta un cu hopi biaha ta ser atribui na e sociedadnan Latino Americano, sinembargo, e proximidad di Aruba y similaridadnan cultural ta permiti e mesun creencianan di genero pa prospera. Chauvinismo masculino, autoridad, y dominio ta central na machismo, esencialmente e concepto aki ta ser considera e manera cu homber ta superior na hende muhe.