Informashon di Wikipedia.

• 
  Empirismo ta un movemento filosofico cu ta declara cu conosemento ta deriva prinsipalmente of completamente for di experencia. Segun epistemologia (teoria di conosemento) di empirismo, hende no ta nace cu conocemento, y mester considera e mente como un pagina blanco of tabula rasa. Den e bista epistemologico aki, empirismo ta al contrario di racionalismo; esta cu rason y pensamento ta e fuente principal di conosemento. The doctrine that we learn by experience may seem a trite truism. The idea that we learn in no other way totally transforms the world. E doctrina cu nos ta siña pa medio di experencia por parse un cliché. E idea cu nos ta siña den ningun otro forma ta completamente transforma e mundo. —Ernest Gellner Den filosofia antiguo, tendensianan empirico por wordo identifica caba cerca Aristoteles y Epicuro. Empirismo lo no a haci un avance te den siglo 17 y 18 na Reino Uni, elabora pa pensadonan manera Francis Bacon, John Locke, George Berkeley, David Hume y John Stuart Mill. Otro forma di empirismo por wordo haya den positivismo di Auguste Comte, pragmatismo di William James, filosofia analitico di Bertrand Russell, empirismo logico di Rudolf Carnap y empirismo constructivo di Bas van Fraassen. Investigacion empirico ta e unico manera acepta pa adkeri conocemento cientifico desde e revolucion cientifico. Aunke mayoria di empirista no ta mucho dogmatico tocante e principio basiko aki, cu individu humano ta siña for di experencia, algun manera John Stuart Mill, ta bai mucho mas leu, y ta argumenta cu asta e leynan logico ta surgi for di experencia. Segun Mill, e axioma logico manera algo no por ta berdad y no berdad na e mesun momento, a simplemente wordo copia for di experencia. David Hume a splica e nocion humano di causalidad, referiendo na e experencia di lamper y strena. Ta conoci for di experencia cu strena ta sigui lamper y cu por spera strena despues di lamper. Pues e creencia den causalidad a surgi for di custumber. Bertrand Russell a indica cu experencia no necesariamente mester deriva di cosnan pafo di e ser humano; pero cu autoreflexion—observa kico ta pasa internamente—tambe ta un forma di observacion. Segun empirismo den su forma mas puro, e mente humano mester ta considera como un blachi blanco, of tabula rasa, pues conosemento no por wordo deriva for di pensamento so, pero tin su base ultimamente den experencia. Empirismo puro y absoluto ta asta nenga e nificacion di tur e conceptonan cu cua e por expresa su mes a priori; esta dialogo simpel (p.e., y, of, si, no, algun, tur, unidad, cantidad, sucesor, infinito). Diferente movemento paden di empirismo: Empirismo materialista di Francis Bacon, Thomas Hobbes y John Locke por wordo distingui for di e empirismo idealista di George Berkeley, David Hume, Ernst Mach y Avenarius . Empirismo por wordo mira como un movemento cu ta opone e idea di conosemento a priori; esta conosemento ta solamente basa ariba pensamento, y cu ta opone e idea cu conosemento ta inherente for di nacemento. Algun ta mira empirismo como un teoria cu ta splica con nificacion ta wordo crea (asociacionismo) y cu ta indica ki ora uzo di idioma ta significante, esaki ta wordo yama e prinsipio di verificacion of verificacionismo. Otronan ta mira empirismo como un teoria di conosemento, cu ta stipula cu declaracion di conosemento, manera ‘Lousie ta amabel’, mester di sosten (continuo) di experencia pa por adkeri e status di conosemento estableci. Un forma extremo di empirismo ta sensualismo, cu ta enfatisa exclusivamente e origen sensorial di tur conosemento. Autoreflexion ainda ta hunga un rol cu Locke, pero den Étienne Bonnot de Condillac esaki ta completamente ausente.