Informashon di Wikipedia.

• 
  Demokrasia (for di griego δῆμος/dèmos, “pueblo” i κρατειν/kratein, “goberná”, pues literalmente “gobernashon di pueblo”) ta un sistema di gobernashon den kua e boluntat di e pueblo ta e fuente di e ehersisio legítimo di poder. Ta hasi un distinshon entre demokrasia direkto, den kua siudadanonan ta vota personalmente riba lei, desishon i nombramentunan, i demokrasia indirekto òf demokrasia representativo, den kua e pueblo ta wòrdu representá pa un órgano elekto, manera un konseho òf parlamento. Den un demokrasia, henter e poblashon ta soberano i tur outoridat ta basá riba e (por lo ménos teórikamente) konsentimentu di e pueblo. E forma di gobernashon aki ta basá riba e ideal humano di igualdat. Si tur hende ta nase liber i igual den dignidat i derecho (manera ta pará den e promé artíkulo di e Deklarashon Universal di Derechonan Humano), e ora ei niun hende no tin mas derecho ku otro pa establesé sierto lei òf tuma desishon. Apliká e teoria ei den práktika polítiko hopi biaha no ta fásil i tin hopi aspekto. Por ehèmpel, Alexis de Tocqueville a argumentá ku libertat i igualdat ta den kontraste ku otro. Demasiado libertat ta bini na kosto di igualdat, pero meskos ta konta al kontrario. Tambe el a atvertí kontra e tirania di e mayoria. No solamente minorianan por haya nan mes oprimí y tuma refugio den violencia, pero e mayoria mes tambe por bira victima di esaki.