Informashon di Wikipedia.

• 
  Físika ta e siensia ku ta trata e propiedatnan general di materia, radiashon i energia, i tambe nan komportashon den espasio i tempu. Físikonan ta studia fenómenonan manera forsa, moveshon, ekilibrio, kalor, lus, zonido, magnetismo i elektrisidat. Físika ta un di e disiplinanan sientífiko mas fundamental. Su meta prinsipal ta pa splika kon mundu ta funshoná i ta wòrdu konstruí, for di universo te na e partikulonan di mas chikitu. Komo un siensia natural, físika ta wòrdu praktiká den un interkambio konstante entre teoria i eksperimento: teorianan ta kondusí na eksperimentonan, miéntras ku eksperimentonan por inspirá teorianan nobo òf prueba pa mas refinashon. Aunke teorianan físiko hopi bia ta kompleho, ta hasi esfuerso pa simplisidat. Albert Einstein a ekspresá esaki ku e deklarashon ku un splikashon mester ta "mas simpel posibel, pero no mas simpel", es desir simplisidat no mester bini na kosto di eksaktitut. Prinsipionan físiko ta importante pa numeroso tereno di investigashon relashoná, manera biofísika i teknologia. P'esei, un delimitashon estrikto di físika ta difísil pa definí. Métodonan i téknikanan desaroyá den físika hopi bia ta wòrdu apliká den otro siensianan i por lanta preguntanan nobo einan, inkluyendo den matemátika i filosofia. Hopi teknologia a surgi for di konosementu optené for di físika. Konosementu di elektromagnetismo, físika di estado sólido i físika nuklear a permití e desaroyo di produktonan ku a kambia sosiedat moderno profundamente, manera televishon, kòmpiuter, aparato di kas i armanan nuklear. Avansenan den termodinámika a stimulá industrialisashon, miéntras ku desaroyonan den mekanika a kontribuí na e desaroyo di kalkulo diferensial.